مهارات التأهيل والتعافي – الجزء الأول – مهارات التعامل مع النفس

كتير مننا .. بيلاقوا صعوبات في حاجات كتيرة زي شغلهم و دراستهم .. وبيحسوا انهم بيبذلوا مجهود كبير جدا نفسيا

و اجتماعيا .. بمعني .. انهم معندهمش القدرة على التحكم في سلوكياتهم وعلاقتهم بالناس الي حواليهم .. دا غير

انهم فاشلين في الحفاظ علي صحتهم او لياقتهم البدنية والنفسية .. في الحلقة دي .. هنتكلم عن المهارات

الاساسية الي بتأهلنا للتحكم في نفسنا و مشاعرنا .. ازاي نتعرف علي مشاعرنا .. وازاي نعبر عنها .. ازاي

نسيطر علي مخاوفنا و علي انفعالتنا .. ازاي نقول لنفسنا لأ وقت ما تكون لأ في مصلحتنا .. هنتعلم

مع بعض مهارات قيادة النفس .. واننا لو قدرنا نتحكم في افكارنا و مشاعرنا و اجسامنا .. هنقدر ساعتها

نتحكم في المواقف الصعبة الي بنمر بيها ..

هنتعلم مع بعض :

• مهارة التعرف علي مشاعرنا
• مهارة التعبير عن مشاعرنا
• مهارة التعامل مع المخاوف
• مهارة ضبط النفس
• مهارة نوكيد الحقوق الشخصية
• مهارة الحفاظ على اللياقة البدنية و العقلية و النفسية

شاهد الفيديو التالي:

اول مهارة هي ازاي نتعرف علي مشاعرنا (نسمي مشاعرنا):

التعامل السليم مع المشاعر هو إن الإنسان يقدر يحس فى نفسه بكل التحركات الوجدانية لأن المشاعر الى جوة الإنسان

هى الطاقة الى بتحرك جسم الإنسان زى الإنفعالات وردود الأفعال وعشان نقدر نتعرف على مشاعرنا فى خطوات لازم ندرب عليها :

1- اول حاجة لازم نعرفها ان التوتر العقلي بيزود التوتر النفسي و العضلي فحاول تتعرف على المناطق المتوترة فى جسمك وحاول تعملها تمرينات استرخاء وبتالي هتبدأ تقلل من حالة التوتر أو الخوف أو الغضب إلى موجودة عندك وممكن تمارس المشى او الرياضة وتغير المكان .
2- إسأل نفسك عن السبب الى مخليك بتحس بالمشاعر دى وايه الى حصل قبل ما المشاعر دى تبدأ تحس بيها
3- حاول تصنف المشاعر وتسميها علشان تعرف تتعامل معاها .. هل هى غضب .. حزن .. توقعات .. هل خوف أو إحساس بالذنب .

وفي مشاعر مركبة :

و زى الإحراج إلى هو مزيج من الخوف والكسوف .. وزى الإحباط وإلى هو مزيج من الحزن والشعور بالذنب والغضب ..

وزى كمان الإثارة وإلى هى مزيج من الفرح والخوف والحماس .. و زى أحاسيس الخزى والعار بسبب سلوكيات عملناها

ومش عارفين نسيطر عليها وتبقى دى اول مهارة إزاى نتعرف على مشاعرنا ونسميها بإسمها الصحيح .

ثانى مهارة هي ازاي نعبر عن مشاعرنا :

كل ما عبرنا عن مشاعرنا وخرجناها سواء بالكلام او بالكتابة او بالرسم .. كل ما هنقدر نتحكم فيها .. لاننا لو كبتنا مشاعرنا

جوانا مع الوقت الامور ممكن تخرج عن السيطرة تماما .. لان زي ما كلنا عرفين ان الكبت بيولد الانفجار وده معناه إن كل ما

نعبر عن مشاعرنا أول بأول كل ما نفرغ الكبت الى جوانا عشان منجيش فى لحظة وننفجر على أبسط الأسباب .. وده

بيحصل بالتدريب يعنى مثلا فى قاعدة بتقول إن 90% من سبب إستيائنا من موقف معين هو مواقف شبيهه قديمة

معرفناش نتصرف فيها .

فلازم نفرغ مشعرنا وأهم حاجة إننا نختار الاشخاص المناسبين الى هنعبر معاهم عن مشاعرنا.. مش مجرد تحكي للاصدقاء و خلاص .

وتعالوا نراجع تانى على الخطوات الى هتخلينا نقدر نعبر عن مشاعرنا :

أول حاجة : نركز مع جسمنا ونعمل تمرينات الاسترخاء زى ما شرحنا قبل كدة فى المهارة الأولى .. او المشي او الرياضة او تغيير المكان .
ثانى حاجة : نحدد نوع الشعور ونصنفه إن كان غضب أو حزن أو توقعات او مخاوف .
ثالث حاجة : نحاول نعبر عن المشاعر الى إحنا حاسين بيها ومن الطرق دى إننا نعبر عن مشاعرنا للأشخاص القريبين مننا و الافضل

اننا نعبر عن مشاعرنا للشخص الى إتسبب فى المشاعر دى ويكون عندنا الشجاعة للموجهة بشكل متوازن بدون انفعال .

رابع حاجة : اننا نكتب الموقف الي حصل و بعدين نقرؤه بعدها بكام ساعات .. و هتكتشف فالموقف حجات كتير مكنتش واخد بالك منها .
خامس حاجة : تقبل الاخطاء من الي حولينا وبلاش نسترجع المشاعر و الموقف مره تانية و محاولة تغييرها داخليا لكن نقبل

الموقف ونتعلم منه .

ومن الأفكار الغلط فى التعبير عن المشاعر :

• إنك تقول إن أنا مش بعرف أعبر عن مشاعرى ودى طبعا فكرة غلط لأنك بالتدريب ومع الوقت هتقدر تعبر عن مشاعرك ..

وبلاش تحكم على نفسك بالفشل .

• إنك تقول لو عبرت عن مشاعرى مش هقدر أتحكم فيها وبالعكس تماما لأنك لو عبرت عن مشاعرك ده هيساعدك إنك تتحكم فيها ويقلل تاثيرها .
• انك تعتقد بإن التعبير عن المشاعر ضعف وده طبعا غلط لأن القوة مش فى إنك تكبت مشاعرك القوة هى انك تقدر تواجه مشاعرك وتتخلص من تاثيرها .
• انك تفتكر إن التعبير عن المشاعر شئ غير مؤثر ومش هيغير من الموقف وبالعكس تمام إن التعبير عن المشاعر هو اه مش

هيغير الموقف لكن هيخليك تقدر تتعامل مع احاسيسك ويزود مهاراتك لمواقف شبيهة فى المستقبل.

ثالث مهارة هي ازاي نتعامل مع الخوف:

كلنا بنخاف ومحدش يقدر إلا انه يخاف وقت ما نتعرض لشئ يفوق قدراتنا .. إنما الى نقدر نعمله هو إننا نتعامل بشكل أفضل

مع المخاوف دى بحيث إنها ما تكبرش لدرجة إنها تكون عائق فى حياتنا ومن المهارات الى محتاجين نتدرب عليها علشان نقدر نسيطر على مخاوفنا :

• أول حاجة نفكر فى سبب الإحساس بالخوف ممكن توصل لعدة إحتمالات إختار أقربهم
• تانى حاجة نفكر ايه نسبة حدوث الى انت خايف منه ده وهل هو تهديد واقعى ولا فى خيالك بس وعلشان توصل لإجابة

ممكن تحتاج ترجع لشخص وتتكلم معاه أو تجمع معلومات أكتر عن الموضوع وتحاول تقرب أكتر من الواقع وتبعد عن الخوف

من المجهول نتيجة الجهل .

• ثالثا إستخدم خوفك بإيجابية يعنى إنك تكون مستعد أكتر وتبذل مجهود أكتر .
• رابع نقطة إننا نحجم المخاوف دى و ازاي متكنش مؤثرة في قراراتنا .. يعني ممكن احس بالخوف بس متصرفش غلط

بناءا علي الاحساس ده لكن إفصل بين الاحساس والفعل.

رابع مهارة هي ازاي تستخدم ضبط النفس:

محتاجين نتعلم نقول لا لنفسنا .. فى مواقف كتير بنتعرض لها فى حياتنا محتاجين نتعلم إزاى نقول فيها لا وقت ما تكون

لا فى مصلحتنا لأن مفيش نمو بدون ألم .. ونفكر دايما فى ان تاجيل اللذة وتحمل الالم هو اهم سبب من أسباب النجاح .

ومن الخطوات الى بتخلينا نقدر نسيطر على نفسنا :

• أول حاجة إننا نركز فى الى بيحصل جوانا من مشاعر زى التوتر والشد العصبى والغضب
• تانى حاجة نشوف ايه الأحداث الى بتحصل حوالينا وبتدفعنا للمشاعر دى
• تالت حاجة نبدا نفكر في العواقب ان الاحساس ده لو سيطر علينا اد ايه ممكن يخسرنا .
• رابع حاجة حاول توقف نفسك للحظات .. لما هتوقف نفسك هتبدا ترتب أفكارك وتعيد حساباتك من الاول .. و اعمل ارباح و خساير

لقراراتك قبل تنفيذها و حاول تبدل الادوار او تحط نفسك مكان الشخص التاني و فكر بطريقة تفكيره وليه اتصرف كده .

هتشوف الصورة كاملة قبل أى قرار وتعرف تضبط نفسك ومتنساش نصيحتنا ( تأجيل اللذة وتحمل الألم هو طريق النجاح )

خامس مهارة هي ازاي نوكد الحقوق الشخصية:

يعنى ايه توكيد الحقوق الشخصية ؟؟ يعنى القدرة على إتخاذ موقف وسط بين التحكم المبالغ فيه والسلبية المتناهية ..

وعشان نفسرها أكتر هى إن الإنسان يأكد حقوقه من غير ما يتعدى على حقوق الآخرين ومن غير ما يسمح لحد إنه

يتعدى على حقوقة ودى الى بنسميها منطقة الإتزان او الوسطية بين العنف والتحكم والسلبية يعني .. ازاي تعبر

عن حقك بشكل مباشر ومؤدب للمتسبب فى الموقف من غيرتجاوز او اساءات او اذي للاخرين أو التحكم فى

سلوك الآخرين لاننا مش هنتعامل مع الخطا بتكرار خطا تاني .

سادس مهارة والأخيرة هي ازاي نحافظ على اللياقة البدنية و العقلية و النفسية :

جسمك هو أقرب صديق ليك .. هو الى هتعيش معاه عمرك كله والجسم هو وعاء الروح .. يمكن تكون حاسس دلوقتى بصحة

كويسة .. لكن دايما جسمك محتاج لصيانة علشان يقدر يخدمك باقى عمرك كله.

وزي ما الإنسانَ يقدر بالرياضة أنه يحسِّن من لياقته البدنية ، فهو كمان يقدر أنه يحسِّنَ من تفكيره بطرق كتير منها علي سبيل

المثال : انه يتخلُّق ببعض الأخلاق الكريمة ، الحوار، القراءة ، الكتابة، تجنُّب أخطاء التَّفكير . فهناك علاقة عكسية بين

مستوى اللياقة البدنية والإصابة بالأمراض النفسية.. فالاستمتاع بالصحة البدنية مرتبط ارتباط إيجابي بالصحة العقلية..

فالنشاط البدني بيساعد على التخلص من التوتر العصبي ، الأمر الي بيساعد على حفظ الصحة العقلية مع مرور الزمن..

ام بقه المقصود باللياقة النفسية ان الانسان يتحلي بقدر ملحوظ من الاستقرار النفسي مع تحقيق الحد الأمثل من الرضا

أو التصالح مع النفس و المجتمع. ومن اهداف تعلّم اللياقة النفسية أن الإنسان يستنير في حياته للأفضل ، لان الي

مبيعرفش يحدد أهدافه في الحياة ، بيكون زي العربية الي ميعرفش قائدها هو رايح فين ، وعلشان كدة لازم

نتعلم ازاي نحدد الأهداف ونرسم الخطط الي هتوصلنا لتحقيق اهدفنا .

اتعلمنا مع بعض :

• مهارة التعرف علي مشاعرنا
• مهارة التعبير عن مشاعرنا
• مهارة التعامل مع الخوف
• مهارة ضبط النفس
• نوكيد الحقوق الشخصية
• الحفاظ على اللياقة البدنية و النفسية و العقلية

.. الهدف من التدريب على المهارات دى هو إننا نتعلم بعض أساليب التعامل مع نفسنا و نتعلم مهارات وجدانية وسلوكية

وإجتماعية بحيث إن يكون عندنا القدرة والوعى على إننا نستخدمها لما نحتاجلها في مواقف حياتنا المختلفة.