مهارات التأهيل والتعافي – الجزء الرابع – مهارات التخطيط

الأهداف الذكية أو (smart) هى جملة مركبة من خمس حروف كل حرف بيرمز لخاصية من الخمس خصائص الأساسية لأى هدف .. علشان يبقى من السهل إننا نفتكرهم .. أول واحد إستخدم المصطلح ده هو الدكتور جورج دوران فى مقال فى إحدى المجلات الأكادمية .

كلمة smart مركبة من الحروف الاولى للكلمات :

S : ومعناها (specific ) وده معناه إنك بتمتلك تصور كامل للهدف من جميع زواياه

M : ومعناها measurable ) ) وده معناه ان الهدف يكون قابل للقياس يعنى نقدر نقيسه سواء بالكمية أو بدرجة الإنجاز

A : ومعناها ( attainable ) وهو إن يكون قابل للتحقيق يعنى ميكنش هدف مستحيل إنه يتحقق

R : ومعناها (relevant ) هو إن الهدف يكون مهم بالنسبة لك مش لمجرد التسلية

T : ومعناها ( timely ) وهو إنه يكون ضمن إطار زمنى محدد

ولو فقد هدفك اى شرط من الشروط دى بيفقد مميزاته كهدف فعال وذكى

شاهد الفيديو التالي:

وتعالوا نبدأ نتعلم مع بعض أول مهارة وهى مهارة وضع الأهداف:

مفيش حياة من غير هدف .. احنا كبشر مخلوقين بالفطرة على اننا نسعى لتحقيق اهداف .. ومن هدف لهدف اكبر.. لان الانسان اللى عايش من غير هدف بيكون بلا قيمة .. وبيصاب بالاحباط والاكتئاب .. فالإنسان الى عايش متجه لهدف معين .. بيسخر كل قدراته وطاقاته وبيحركها فى اتجاه نقطه واحده من غير تشتت .. لكن الانسان الى ماشى من غير هدف محدد .. عمره ما هيوصل لاى شىء .. ولما نشوف هدفنا فى خيالنا ونحلم بيه .. فده بيدينا الحماس والطاقه علشان نحقق الحلم ونخليه حقيقه على ارض الواقع .

ازاى نحدد اهدافنا :

• اول حاجه : حاول تفهم نفسك وتحدد بالظبط انت عايز ايه من الحياه .. او ايه نوعيه الحياه الى نفسك تعيشها

• ممكن فى البدايه تحدد لنفسك اهداف صغيره .. ولما تحقق هدف منهم تبدا تتحرك للهدف اللى بعده .. ولو الهدف كبير وصعب تحقيقه ممكن تقسمه لاهداف صغيره وتحدد لكل هدف منهم الزمن التقريبى لتحقيق كل هدف .

• اكتب الاهداف دى حسب ترتيبها .. و ممكن تعلقها على الحيطه او فى مكان يكون قريب من عينك .

• اجمع كل المعلومات الى انت محتاجها فى تحقيق الهدف .. ممكن تسأل اصدقاءك او متخصص فى مجال معين ..ومتكتفيش بشخص واحد .. او تخش على النت .. او كل اللى فات .

• واخر حاجه .. ابدا فى تحقيق الهدف بخطوات عمليه من غير تأجيل .

تانى مهاره هى ازاى تتعرف على قدراتك الشخصيه :

كل مازادت درجة نضجنا .. كل مازادت قدرتنا على اكتشاف نفسنا وتحديد ايجابياتنا وسلبياتنا .. ونقاط القوه والضعف بشكل واقعى .. ونحاول ننمى نقاط القوه اللى عندنا .. ونقلل تاثير النقاط السلبيه على حياتنا ومستقبلنا .. هنحاول نوضح فى عده نقاط ازاى نحدد ايه هى القدرات الى محتاجين ننميها لتحقيق اهدافنا.

• حاول تحدد ايه هى القدرات الى محتاجها علشان تحقق المهمه الى انت محددها لنفسك لتحقيق هدفك .

• فكر فى التجارب السابقه الى حاولت تستخدم فيها نفس القدرات ولو نجحت نجحت ليه ؟ ولو فشلت فشلت ليه ؟

• ممكن جدا تسال اهل الخبره .. وتاخد راى الى حواليك واصحاب التخصصات الى ليها علاقه بالى انت بتسعى ليه .. والى انت واثق فيهم .

تالت مهاره هى مهارة جمع المعلومات :

من خلال جمع المعلومات هتقدر تستفيد من اخطاء الغير او تتعلم من نجاحتهم .. وبقى من اسهل ما يمكن فى الوقت الحالى انك تجمع المعلومات الى انت محتاجها في وقت قليل وبمنتهى السهوله فى ظل التكنولجيا والانترنت .. والتحدى اللى بيطرح نفسه دلوقتى فى ظل كم المعلومات المتاحه هو ان يكون عندك القدره على انك تقدر تقيم المعلومات دى وتتاكد من مصدرها وتصنفها وتحدد ايه هى المعلومات الى انت محتاجها بالظبط .

وتعالوا نتعرف على الطرق الى ممكن بيها نجمع المعلومات الى احنا محتاجنها ..

• اول حاجه : حدد نوع المعلومات اللى انت محتاجها .. هل هى معلومات عامه ؟ ولا معلومات خاصه ؟ محتاجه لشخص متخصص.

• تانى حاجه متاخدش معلوماتك من مصدر واحد .. حاول تلجا لاكتر من مصدر .. زى انك تخش على النت او تشترى كتاب او حتى تزور مكتبه عامه

• اسال اكتر من شخص من اصحاب الخبره واصحاب التخصصات اللى ليها علاقه بموضوعك

• ودايما خلى فى اعتبارك ان المعلومات الى هتجمعها ممكن تخليك تعدل من قراراتك واهدافك او ممكن تغير هدفك بالكامل

رابع مهاره هى مهاره ترتيب الاولويات :

فى طرق كتير لترتيب الاولويات .. فى ناس بترتب اولوياتها على حسب درجة الاهميه .. وفى ناس بترتب اولوياتها على حسب درجه الصعوبه لان فيه ناس بتحب تبدا بالاصعب علشان تستفيد من الحاله الحماسيه اللى بتكون عندهم فى الاول قبل ما تخمد .. وفيه ناس بتبدا بالاسهل علشان يحسوا بالانجاز والنجاح واللى هيديهم حماس علشان يكملو للنهايه.

ازاى نرتب اولويتنا :

• فكر فى المهام الى انت محتاج تنفذها .

• تخيل خطوات تنفيذ المهام دى فى مخك وحدد ترتيبها المنطفى

• وانت بترتب الاولويات دى خلى فيه بعض المرونه .. بمعنى ان مثلا لو فيه مهمه ممكن تعملها حتى ولو مش فى ترتيبها لكن هى فى مكان قريب منك علشان توفر فى الوقت والجهد .

• ولما تعمل جدول زمنى حاول تخليه واقعى .. لكن بطاقة اكبر منك شويه .. مش بنفس سرعتك الى انت متعود عليها علشان تنمى مهاراتك وقدراتك .. وتدرب على انجاز العمل فى وقت اقل .. وفى نفس الوقت ميكونش حجم المهام ضخم وفى وقت قليل .. لان ده ممكن يسببلك بعض الاحباط لما تفشل فى انجاز المهام دى .

• واهم حاجه متنساش حقك فى الراحه والترفيه .

• وممكن توكل شخص بمهمه من المهام الى انت محددها لاقتناعك بانه هيقدر ينجزها افضل منك .

خامسا مهاره صنع القرار:

كل يوم بناخد آلاف القرارات من غير ما نشعر .. لأن كل شئ بنعمله وكل كلمة بنقولها هى نتيجة قرار .. أغلبية قرارتنا بتيجى بسرعة ومن غير ما نفكر فيها او ندرسها كويس .. لكن فى قرارات مصيرية لازم نتئنى ونفكر فيها من كل الزوايا .. لان إتخاذ القرار ممكن ميحتجش لمهارة وتدريب .. لكن بيحتاج لجرأة وقدرة على تحمل المسؤولية .. أما صنع القرار فمحتاج للتأنى والتدريب والتعلم :

ومن خطوات صنع القرار :

• أول حاجة .. اعمل قايمة بالاختيارات المتاحة ادامك .. ممكن فى البداية تشوف إن مفيش إلا اختيار واحد .. لكن مع التأنى فى التفكير ممكن تكتشف أكتر من بديل أو إختيار .

• تانى حاجة .. إجمع اكبر قدر من المعلومات وإسال اكبر عدد من الناس .. ممكن تلاقى إقتراح أو فكرة يغيروا موازين قرارك.

• وبعدين إدرس نتائج كل إختيار على حدي .. وإكتب إيجابيات وسلبيات كل إختيار .

• وبعدين إختار الإختيار الأكتر إيجابيات والأقل سلبيات .. ويكون قابل للتحقيق .

• خليك مستعد لتحمل مسؤولية القرار .. وجهز خطة بديلة فى حالة الفشل .

• طبق قرارك بكل حماس من غير ما تفكر فى الإختيارات التانية .

• قيم النتائج بكل أمانة .. وخليك مستعد للإعتراف بالفشل والتعلم منها .

سادس وآخر مهاره هى إنجاز المهمة من غير تشتت:

التشتت من أخطر أعداء النجاح .. وعلشان كدة هنقدم لكم بعض النصائح الى هتساعدكم على التركيز فى إتمام المهمة أيا كانت:

• حاول تكتشف الأسباب الى بتخليك مش عارف تركز أو بتشتتك .

• خد حقك كامل من النوم والراحة .. وحافظ على إن يكون النوم فى وقت الليل والنشاط والعمل يكونوا فى وقت النهار

• إعمل لنفسك قوائم بالمهام اليومية او الأسبوعية .

• رتب القوائم دى على حسب الاوليات .

• راجع كل فترة الى انت انجزته والى انت مأنجزتوش .. وحدد الأسباب الى عطلتك عن انجاز بعض المهام وازاى تعالجها .. وإزاى تحسن من أدائك فى الفترة الى جاية .

إتعلمنا مع بعض .. إزاى نحدد اهدافنا .. ونتعرف على قدراتنا .. وإزاى نجمع المعلومات المطلوبة عن الأهداف دى .. وإزاى نرتب اولوياتنا .. وناخد القرار المناسب .. وازاى نبدا فى إنجاز المهمة من غير ما نتشتت .. قدمنا لكم نصائح عملية لمجموعة من المهارات الأساسية لحياتنا النفسية والإجتماعية والعملية .. تفتح لنا الطريق للمحاولة والتجربة من غير خوف أو إستصعاب الأشياء .. ومع مرور الوقت هتكتشف طريقتك الخاصة فى التفكير .. وهتعرف الطريقة الأفضل للتحكم فى سلوكك وبناء العلاقات الصحية.