مهارات التأهيل والتعافي – الجزء الثالث – مهارات التعامل مع الضغوط

حياة مفيهاش فشل .. معناها إن مفيش نجاح ولا حلم .. وسواء نجاح او فشل .. كل دى ضغوط بتحتاج مهارات الحياة اليومية .. فى الفيديو ده هنتعلم مع بعض فن مهارات التعامل مع الضغوط الى بتتكرر فى حياتنا زى الفشل .. الإحباط .. الإستفزاز أو السخرية من الآخرين .. أو زى إن الناس تحاول تقنعنا بشئ مش مقتنعين بيه . وإزاى نقدر نتعامل مع الضغوط دى من غير ما نفقد السيطرة على نفسنا .. ومن غير ما نخسر علاقتنا بالناس.

شاهد هذا الفيديو:

وتعالوا نبدأ نتعلم مع بعض إزاى يبقى عندنا روح رياضية :

يعنى ايه روح رياضية .. يعنى تبقى على إستعداد لتقبل الهزيمة بهدوء ومن غير حساسية .. يعنى المنافسة الشريفة الى من غير تعصب ومن غير ما تخسر علاقتك بالناس أو بزمايلك أو بأصدقائك سواء فى المدرسة أو فى الشغل أو فى النادى .. الضغوط النفسية الشديدة بتحصل فى الغالب بسبب روح المنافسة بين الشباب وبعضهم .. ومع مرور الوقت بتوصل لنتائج سلبية حتى ولو كانت إيجابية فى البداية .. وده لأننا محتاجين نتعلم إزاى يكون عندنا روح رياضية .. إزاى ؟؟

• فى حالة فوزك على المنافس .. بلاش تتفاخر بشكل مستفز وتتكبر .. لأن ده ممكن يسبب بعض الغضب أو الكراهية عند المنافس بتاعك

• طبيعى جدا إنك تفرح وقت الفوز .. أو تحزن وقت الهزيمة .. لكن حاول متفكرش فى النتيجة أكتر من اللازم .. وفكر فى الإمتنان للى ساعدوك وفى الخطوة الى بعد كدة .

• إفتكر دايما إن الهزيمة مش نهاية العالم .. وإن الأولى بالتفكير هو أسباب الهزيمة وايه الى محتاج أطورة فى نفسى عشان مكررش الأخطاء دى فى المرة الى جاية

• شجع نفسك وشجع المنافس بتاعك على أداؤه .. أيا كانت النتيجة .

تانى مهارة هى مهارة التعامل مع الإحراج أو التجاهل:

التعرض لمواقف محرجة شئ وارد .. وكتير من المواقف الى بنمر بيها فى حياتنا ممكن نحس فيها بالإحراج .. زى إنك بتاكل مثلا فى عزومة والأكل وقع على هدومك .. أو تخش محل عشان تشترى حاجة وبعدين تكتشف إنك نسيت الفلوس فى البيت .. كمان ممكن فى المواقف الإجتماعية تحس فيها بالتجاهل .. زى إنك تكتشف إن أصدقائك إتفقوا على الخروج ومحدش بلغك بيها .. أو تكتشف إن فى خبر الكل يعرفه وانت الوحيد الى متعرفوش بالذات .. والسؤال إلى بيطرح نفسة دلوقتى .. إزاى أتعامل مع المواقف دى :

• أحسن رد فعل يخرجنا من المواقف المحرجة هو التجاهل أو الضحك .

• ونفكر نفسنا إن المواقف دى بتحصل لكل الناس وإنها غير إرادية والكل عارف كدة .

• متقومش بأى رد فعل مبالغ فيه لان دا هيطول من وقت الموقف وهيديله حجم أكتر من حجمة .. وإنك لو تجاهلت الموقف هيتنسى فى دقايق .

• أما فى حالة التجاهل فحاول تفكر فى الأسباب الى خلتهم يتجاهلوك .. وهل المشكله عندك ولا عندهم .. وراجع نفسك لان ممكن يكون السبب هو طريقة معاملتك معاهم .

• وممكن تاخد الامور ببساطة وتلفت نظرهم إنهم يحطوك فى الإعتبار فى المرة الجاية .

• أو إنك تنظم خروجة وتدعوهم ليها .

• مهم جدا نكون عارفين إن قيمتنا الذاتية مبتتاثرش بموقف أو عدة مواقف .. متخليش موقف يأثر فى ثقتك بالآخرين .. إذا غضبت من الموقف بشكل مبالغ فيه فإعرف إنك بالفعل خرجت عن إتزانك النفسى .. واستسلمت لإحساس الدونية والكبرياء الزائف .. وده بيوضح ضعف الصورة الذاتية ليك .

تالت مهارة هى مهارة التعامل مع الفشل:

مفيش حد يقدر يوصل للنجاح إلا إذا عدى بمراحل فشل وقدر يتغلب عليها لأن محاولات الفشل بتزود من خبرتك وبتقربك خطوة للنجاح .. فالفشل هو محطة وارد جدا إنك تعدى عليها فى طريقك للنجاح .. وده الى بنسميه المرونة النفسية .. بمعنى .. قدرة الشخص على إنه ينضغط لكن ميتكسرش .. ويرجع تانى لحالته الطبيعية ويحاول مرة تانية مع تجنب الأخطاء الى إتسببت فى فشل المحاولة الى فاتت .

إزاى نتعامل مع الفشل :

• حاول تحافظ على هدوءك وتقبل الخطأ .. لانك لما تحافظ على هدوءك فده هيساعدك فى التعامل مع المشكلة بشكل أفضل وتشوف تفاصيل الأخطاء .

• متهتمش بكلام الناس .. وحاول تسترخى أو ترفه عن نفسك قبل ما تبدا فى التفكير فى أسباب الفشل .. وبعدين فكر فى الأسباب والعوامل الى إتسببت فى الفشل من غير ما تلقى باللوم على الآخرين ومتعملش إسقاط أو تعيش دور الضحية .

• حاول تتعلم من الفشل .. وايه الصح الى كان المفروض تعمله فى المرة الى جاية .

• كرر المحاولة مع مراعاة الأخطاء الى فاتت وبرضه متستناش التقييم لنجاحك من الناس .. قيم نفسك بقياس نسبه ادائك واتمامك للهدف .

رابع مهارة هى مهارة التصدى للإقناع:

من أهم علامات نضج الإنسان .. إنه مينجرفش لمحاولات اقناعه بعمل شئ هو مش عاوز يعمله .. وخصوصا لو كانت الناس الى بيحاولوا يقنعوا مهمين بالنسبة له .. فأحيانا بنخضع لضغوط الإقناع عشان نحافظ على العلاقات .. مع إن العلاقات الصحية هى الى بتحترم حرية الأشخاص وإستقلاليتهم .. والى بتسمح بالإقناع والإختلاف فى إطار المحبة والإحترام المنبادل .
إزاى نتعامل مع ضغوط الإقناع :

• أول حاجة إسمع بإنفتاح رأى الشخص أوإقتراحه .. وحاول تفهم وجهة نظره .

• وبعدين حاول تحدد نقاط القوة والضعف فى كلامة .

• حاول تحرر نفسك من المشاعر الى ممكن تأثر عليك والى منها :

إنك تحس بالإحراج من رفض كلامه

أو تحس بالخوف من إنك تخسره لو رفضت كلامه

أو بالغضب لأنك حاسس إنه بيحاول يأثر أو يسيطر عليك

• حدد رأيك فى الموضوع .. والمزايا والعيوب وبعدها إختار القرار الأصوب والأقل عيوب

• لو حسيت بضغط كبير من زمايلك على شئ إنت مش عايزه :

ممكن تستخدم الفكاهة أو تتجاهل الطلب وتغير الموضوع.

أو ممكن تقدم سبب واضح ومقنعة لرفضك للموضوع .

وفى بعض الأوقات بيحتاج الموضوع للحسم بإنك تقول لأ صريحة وواضحة

ولو إتعرضت لإغراء وبدأت تدخل فى صراع نفسى .. ممكن تسيب المكان وتبعد وتعيد تقييم أولياتك .

خامس مهارة هى مهارة التعامل مع السخرية :

من المواقف المؤلمة الى ممكن تتعرض ليها فى حياتك هى إنك تتعرض للسخرية .. وخصوصا لو كان من أشخاص بتحبهم .. معظم مواقف السخرية بتكون من باب الفكاهه .. لكن مش كل الناس بيقبلوا ده .. فالموضوع لما بيزيد عن حده بيكون غير مقبول .. فلو إتعرضنا للسخرية من أى شخص .. ايه الى ممكن نعمله :

لو حد حاول يسخر من شكلك مثلا أو من الملابس الى انت لابسها ممكن تبتسم بثقة أو تقوله تفتكر كدة ؟ أو إن ده رأيك إنت أو انى معجب بشكلى كدة أو إن فى كتير قالولى إنى شكلى كدة أحلى أو تسخر من نفسك معاه وإنك معجب بنفسك كدا .

ولازم تعرف إن مشاعرك ملكك إنت لو حد حب يخليك تحس بالإهانة فإنت الى فايدك تختار إنك تحس بالإهانة ولا لأ .. والأولى إنك تشفق عليه أو متهتمش بكلامه أو تتجاهله

ممكن تستخدم الفكاهة وتحول الموقف كإنه هزار .. أو ممكن تسيب المكان وتمشى .

وأهم حاجة .. حاول متهنش حد علشان الموضوع ميكبرش ويتعقد .

ودايما فكر نفسك بإن الى بيسخر منك هو الى عنده المشكلة مش إنت

سادس مهارة هى مهارة تجنب الشجار :

المهارات الى إتعلمناها فى التعامل مع السخرية .. مفيدة جدا لتجنب الشجار .. لكن فى بعض الأوقات بيكون الموقف صعب .. وممكن يبقى فيه إهانه كبيرة .. أو إن فى شخص بيحاول يجرك لعراك بدنى .. وفى الحالة دى لازم تفكر نفسك بإن القوة مش إنك تنتصر عليه بدنيا .. لكن القوة هى إنك تقدر تحافظ على هدوءك .. فالأقوى هو الى يقدر يتحكم فى غضبه .

وعلشان نتجنب الشجار فى المواقف دى محتاجين نتعلم بعض الخطوات :

• أول حاجة حافظ على المسافة الى بينك وبين الشخص الى عاوز يتعارك معاك .
• وفكر هو ليه عاوز يتعارك معاك .. وممكن تساله بهدوء عن السبب .
• فكر فى النتايج إلى على المدى البعيد .. وايه الى ممكن يحصل لو إتعاركت معاه .
• فكر فى البدائل المتاحة أدامك .. زى إنك تتكلم معاه بهدوء وعينك فى عينه وحاول تعبر عن حقك بهدوء .. ولو الموضوع صعب ممكن تنسحب بهدوء وحاول تتجاهل محاولات إستفزازك بالسب والإهانات .
• لو قدرت تتحكم فى نفسك فده فى حد ذاته مكسب كبير .. ودليل قوة مش ضعف .
• وحاول تتأكد من إن الشخص ده فى وعيه .. يعنى ميكنش تحت تأثير المخدرات او الخمور .

إتعلمنا مع بعض فى الفيديو ده :

• إزاى نتحلى بالروح الرياضية
• إزاى نتعامل مع المواقف المحرجة او التجاهل
• إزاى نتعامل مع الفشل
• إزاى نتصدى لمحاولات الإقناع بشئ نرفضة
• إزاى نتعامل مع السخرية
• وأخيرا تجنب الشجار

طبيعى جدا اننا نمر بضغوط فى حياتنا .. ومش كل الضغوط وحشة .. لان ساعات فى ضغوط بتخلينا نخرج أحسن ما فينا .. المهم إننا نعرف إزاى نتعامل مع الحياة تحت ضغط .. وعلشان نتعلم ده .. محتاجين الممارسة والتكرار والفشل والنجاح .. لأن فى بعض المواقف بتكون فجائية ومحتاجة التفاعل والتصرف بسرعة .